நாகர்கோவில் இயேசுவின் திரு இருதய ஆலயம் ஒரு சிறு குருசடியுடன் தனது பயணத்தைத் தொடங்கியது. ஆரம்பத்தில், அசிசி பள்ளி வளாகத்தின் மேற்குப் பகுதியில் அருட்தந்தை இரபேல் சில்வா அடிகளார் இயேசுவின் திரு இருதயத்திற்கு ஒரு சிறு குருசடி அமைத்து மாலை நேரங்களில் செபமாலையும் வழிபாடும் நடத்தினார். அதைத் தொடர்ந்து, அருட்பணி. பெனடிக்ட் அலெக்சாண்டர் அன்றைய ஆயர் மேதகு ரோச் ஆஞ்ஞிசாமி அவர்களின் அனுமதியுடன் அச்சகத்தோடு இணைந்த ஒரு சிற்றாலயத்தை (Private Chapel) ஏற்படுத்தி, நாகர்கோவில் நகரப் பகுதி மக்களுக்காக திருப்பலியும், மறைக்கல்வியும் நடத்தினார். 1963இல் அருட்பணி. J.N. சீசர் அவர்கள் இச்சிற்றாலயத்தில் தினமும் காலைத் திருப்பலியும், ஞாயிற்றுக்கிழமைகளில் மாலைத் திருப்பலியும் நிறைவேற்றினார். இருப்பினும், இது கோட்டாறு பங்காகவே இருந்தது குறிப்பிடத்தக்கது.